طلب غريب

- ممكن اطلب منك طلب غريب شوية ؟

* أؤمرى!

- ممكن احضنك؟!!

* تعالى..

كانت دى بداية انهيار كل حاجة لحد دلوقتى مفيش حاجة فاهمها ولا فاهم ليه كل دا بيطلع لفوق ولا ليه كل دا بيحصل، بس انا عارف كويس إن الحضن دا كان سبب إنى قلت الجملة اللى معرفش لحد دلوقتى ليه قلتها، معرفش فين المشكلة فيها غير إنى لقيت نفسى بقول الجملة بكل حرقة وبكل ما فى حواسى من وجع " أنا تعب ومبقيتش قادر أعافر ولا قادر ارجع اقف تانى، مبقيتش قادر وعاوز اخلص، بس أنا مبقدرش اعمل حاجة عشانكم أنت الكوممفورت زون بتاعتى".

يمكن كنت بحاول اتفادى الوقوع وبتفادى انزل لتحت واقع ، بس كل دفاعاتى وقعت فى اللحظة دى. مقدرتش اتمالك نفسى لحظة واحدة ومقدرش اسيبها فضلت فترة، معرفش ليه ، بس عارف إنى كنت عاوز أقول حاجات كتيرة جداً معرفش ولا حاجة منهم ولا كنت هعرف أقول أى حاجة غير "أنا كويس و هفضل كويس متخافيش عليا" يمكن من جوايا عارف إنى كداب وعارف إنى مش كويس و إنى فعلاً تعبت وعاوز حد يكون جنبى بأى شكل كان، يمكن مش محتاج أكتر من حد يفضل يفكرنى إنى محتاج اصبر، أنا فعلاً محتاج حاجات كتيرة أولها افصل عن الكلية والناس اللى منها ومن السخافات اللى بتحصل عن طريقها، محتاج اعيش حياتى بعيداً عن المواضيع دى كلها، محتاج أموت فترة بمعنى أموت واغيب عن الوعى بس من غير مخدرات أو حتى مرض اخسر فيه جزء من صحتى. يمكن محتاج دكتور نفسانى بشكل كبير جداً بس للأسف واضح إنه هيكون من غير فايدة ولا هيكون ليه أى لازمة بعد آخر مرة/أول مرة.